Rusiya Nüvə Sınaqlarının Hərtərəfli Qadağası Müqaviləsindən çıxmaq üçün daha bir addım atdı

Nüvə Sınaqlarının Hərtərəfli Qadağası Müqaviləsinin ratifikasiyasının geri çağırılması barədə qanun Rusiya Federasiyasının Şurasına daxil olub.

Trend-in xəbərinə görə, bu barədə Rusiya parlamentinin yuxarı palatasının vitse-spikeri Konstantin Kosaçev özünün “Telegram” kanalında məlumat verib. Onun sözlərinə görə, sənəd plenar iclasda oktyabrın 25-də nəzərdən keçiriləcək.

Xatırladaq ki, müvafiq qanun layihəsi Rusiya Dövlət Dumasına oktyabrın 13-də təqdim olunub. Oktyabrın 18-də Rusiya Dövlət Duması qanunu 3-cü oxunuşda qəbul edib.

Qeyd edək ki, Nüvə Sınaqlarının Hərtərəfli Qadağası Müqaviləsi 1996-cı il sentyabrın 24-də BMT Baş Assambleyası tərəfindən təsdiq olunub. Müqavilə nüvə yüklərinin sınaq partlayışlarını, həmçinin dinc məqsədlər üçün nüvə partlayışlarını qadağan edir.