Benksinin üç əsəri Britaniya vergi ödəyicilərinə təxminən 150 min funta başa gəlib

Məşhur küçə rəssamı Benksinin üç əsərinin təmizlənməsi və mühafizəsi üçün indiyədək Britaniya vergi ödəyicilərinin vəsaitindən təxminən 150 min funt sterlinq xərclənib.

Hakimiyyet.info.az BBC-yə istinadla xəbər verir ki, ən böyük xərc 2025-ci ilin sentyabrında Londondakı Kral Ədalət Məhkəməsinin binasında çəkilmiş divar rəsmi ilə bağlı olub. Əsərin silinməsi və ərazinin mühafizəsi üçün indiyədək 85 min funt sterlinqdən çox vəsait sərf edilib.

Britaniyanın Ədliyyə Nazirliyinin məlumatına görə, II dərəcəli tarixi abidə statusuna malik binanın divarındakı boyanın təmizlənməsinə 50 min funt sterlinq xərclənib. Əlavə olaraq, işçilərin artıq iş saatları və təhlükəsizlik tədbirləri üçün 35 min 300 funt sterlinq ödənilib.

Məlumat BBC-nin informasiya azadlığı haqqında qanun çərçivəsində göndərdiyi sorğular əsasında açıqlanıb. Bu rəqəmlərin Benksinin əsərlərinin vandalizm, yoxsa dəyərli ictimai sənət nümunəsi olması ilə bağlı müzakirələri yenidən gündəmə gətirəcəyi bildirilir.

Sözügedən divar rəsmi 2025-ci il sentyabrın 8-də Londondakı Kral Ədalət Məhkəməsinin binasında peyda olub. Əsərdə parik taxmış hakim əlindəki çəkiclə etirazçıya zərbə endirərkən təsvir edilib. Benksi daha sonra əsərin ona məxsus olduğunu öz internet səhifəsində və “Instagram” hesabında paylaşım etməklə təsdiqləyib. 1990-cı illərdə Bristolun qraffiti səhnəsində tanınmağa başlayan Benksi hazırda dünyanın ən məşhur küçə rəssamlarından biridir. Onun çox vaxt gecə saatlarında ortaya çıxan divar rəsmləri və instalyasiyaları geniş ictimai marağa səbəb olur.