İftar süfrəsi üçün hazırlayın
03.05.2020“Hakimiyyet.com” xəbər verir ki,
“Nağıllar aləmi” salatı
Ərzaq:
Hisə verilmiş toyuq – 200 qr.
Qara gavalı qurusu – 70 qr.
Yumurta – 3 ədəd
Pendir – 100 – 150 qr.
Göbələk – 150 qr.
Soğan – 1 ədəd
Sarımsaq – 1 diş
Fındıq – 50 qr.
Mayonez
Duru yağ
Duz, istiot zövqə görə
Üstünü bəzəmək üçün:
Qırmızı bibər
Nar dənələri
Cəfəri və şüyüd
Hazırlanması:
Toyuğu dördkünc şəkildə doğra. Pendiri və fındığı sürtgəcdən keçirt. Bişmiş yumurtanın ağını sarısından ayırıb, xırda doğra. Sarının birini salatın üzərini bəzəmək üçün saxla. Qara gavalını yuyub, 20 dəqiqə isti suda saxladıqdan sonra doğra. Doğranmış soğanı və göbələyi duru yağda qızart. Sarımsağı əzib, mayonezlə qarışdır.
Bişmiş göbələyi qaba yayıb, üzərinə mayonez çəkib, azca fındıq tök. İkinci qata yumurta sarısı, üzərinə pendirin yarısını, mayonez və fındıq əlavə et. Sonra toyuğu töküb, mayonez çək. Sonuncu qata pendir və yumurta ağı töküb, üstünə mayonez sürt. Salatın üstünü nar dənələri, keşniş, cəfəri və bibərlə bəzədikdən sonra 3 saat soyuducuda saxla.
İmambayıldı
Ərzaq:
Badımcan – 5 ədəd
Soğan – 3 ədəd
Doğranmış pomidor – 3 ədəd
Doğranmış bibər – 3 ədəd
Sarımsaq – 3 diş
Cəfəri – 1 dəstə
Zeytun yağı, duz və istiot
Qənd – 1 ədəd
Hazırlanması:
Badımcanların qabığını təmizləyib, ortalarını azca kəsib (badımcan dolmasındakı kimi), duzlu suda yarım saat saxla. Badımcanların suyunu sıxdıqdan sonra yağda qızart. Sonra qalan yağda xırda doğranmış soğanı azca qızart. Üzərinə xırda doğranmış pomidor, bibər, duz və istiot töküb, 15 dəqiqə vam odda bişir. Hazır olduqdan sonra üzərinə cəfərini və qəndi əlavə et. Qarışığı badımcanların içərisinə doldurub, qaba qoy. Üzərinə 1,5 stəkan su və bir az yağ töküb bişir. Süfrəyə soyuq halda verilir.
Yoqurtlu keks
Ərzaq:
Yoqurt – 1 stəkan
Yumurta – 3 ədəd
Şəkər tozu – 0,7 stəkan
Kərə yağı – 40 qr.
Duru yağ – 2 x/q.
Gavalı qurusu – 100 qr.
Kişmiş – 100 qr.
Qabartma tozu – 1 ədəd
Un – 1,5 stəkan
Hazırlanması:
Quru meyvələri isti suda 5 dəqiqə saxlayıb, suyunu süzüb, dəsmalla qurutduqdan sonra üstünə azca un səp. Yumurtanın ağını sarısından ayır. Sarının üstünə şəkər tozu əlavə edib, mikserlə qarışdır. Üzərinə vanil, duru və kərə yağını töküb, qarışdırmağa davam et. Sonra yoqurtu tök. Mikserlə bir az çaldıqdan sonra un, qabartma tozu və quru meyvəni töküb, qaşıqla qarışdır. Kənarda yumurtanın ağını beze halına gələnə kimi qarışdırıb, xəmirə əlavə et. Qabı yağlayıb xəmiri tök, 180 dərəcədə bişir. Hazır olduqdan sonra üzərinə qənd tozu səp.











