“OCOS” beynəlxalq dələduzluq piramidasının daha bir qadın üzvü məhkəmə zalından həbs edildi

“OCOS” beynəlxalq dələduzluq piramidasının daha bir qadın üzvü məhkəmə zalından həbs edildi

10.02.2023 Off By Füzuli İsmayılov

Vətəndaşlara qarşı “şəbəkə biznesi” adı ilə külli miqdarda dələduzluq edən mütəşəkkil dəstənin daha bir üzvü məhkəmə zalından həbs edilib. Bakı Ağır Cinayətlər Məhkəməsində külli miqdarda dələduzluqda ittiham olunan dəstənin işi üzrə məhkəmə prosesi keçirilib.

Hakim Azad Məcidovun sədrliyi ilə keçirilən prosesdə qərar qəbul edilib.

Məhkəmənin qərarı ilə mütəşəkkil dəstənin üzvü Yeganə Məmmədova barəsində həbs qəti imkan tədbiri seçilib.

İttihama görə, Xəyal Yaxyayev, Gülara Abdullayeva və Yeganə Məmmədova qabaqcadan əlbir olan bir qrup şəxs halında kriptovalyuta satmaq adı ilə vətəndaşları aldadaraq onların pul vəsaitlərini ələ keçirməkdə ittiham olunublar.

Müəyyən olunub ki, Bakı şəhər sakinləri Gülara Abdullayeva, Xəyal Yaxyayev və digər şəxslər ölkə daxilində “İnsuccess” adlı fəaliyyət istiqaməti qeyri-müəyyən olan şirkət yaradıblar.

Daha sonra onlar “OCOS” beynəlxalq dələduzluq piramidasını ölkəyə gətirərək yaratdıqları şirkət vasitəsi ilə sosial şəbəkələrdə piarını həyata keçirməklə geniş yayılmasını təşkil ediblər.

Bu şəxslər internet şəbəkəsində xüsusi lokal proqramlar vasitəsi ilə əslində mövcud olmayan kriptovalyuta yaradaraq guya onun beynəlxalq valyuta bazarında satışını təşkil etdiklərini və şişirdilmiş yüksək gəlirlər vəd etməklə vətəndaşların pul vəsaitlərini aldatma yolu ilə ələ keçiriblər.

Bu qayda ilə adı çəkilən şəxslər qurduqları şəbəkə biznesinə piramida şəklində çoxsaylı vətəndaşları cəlb edərək onlara faktiki mövcud olmayan, uydurulmuş kriptovalyuta satıblar.

Araşdırma zamanı dəstə üzvlərinin investisiya paketi adı altında şişirdilmiş yüksək gəlirlər təklif ediblər, ümumilikdə 10 minə yaxın vətəndaşı aldatdıqları və təxminən külli miqdarda vəsaitlərini ələ keçirdikləri müəyyən edilib.

Gülara Abdullayeva, Xəyal Yaxyayev və Yeganə Məmmədovanın barəsində Cinayət Məcəlləsinin 178.3.1-ci (mütəşəkkil dəstə tərkibində dələduzluq), 178.3.2-ci (Dələduzluq, külli miqdarda ziyan vurmaqla törədildikdə) , 193-1.3.1 və 193-1.3.2-ci (mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) maddələri ilə cinayət işi başlanıb.
Cinayət işi üzrə 217 nəfər zərərçəkmiş şəxs qismində tanınıb.
Xəyal Yəhyayeva və Gülarə Abdullayeva həbs edilsə də Y. Məmmədova haqqında ev dustaqlığı qətimkan tədbiri seçilmişdi.

Share